بكل صراحة ووضوح, ما كان مفهوم الي ضمنا, اني "انا بقدر"  , وحتى اليوم بعد كل المواجهات اللي مرقتها في حياتي , هادا الشعور "بيدُق باب" قدراتي وثقتي بنفسي من جديد.

لكن انا اليوم في مكان مختلف تماما, واليوم عندي الوسائل والطرق يلي بقدر اتعامل مع هادا الشعور بشكل مختلف.

واضح الي انه النجاح, ومش مهم في أي مجال, مربوط بشكل مباشر مع الشعور الداخلي, اذا انا بقدر او ما بقدر  اعمل اللي انا بدي اعمله .

وكثير من الاحيان , الشعور بعدم القدرة "بيدُق باب" مشاعرنا وحواسنا الداخلية أو بيجينا من مكان غريب ومن غير وعي اله . في اعماقنا منُشعر بعدم القدرة وفجأة المشروع بيوقف, ما بيتحرك, ما بيتقدم!

عشان هيك ... المعرفة (المربوطة بشكل مباشر بالوعي الخاص فينا) , وفقط المعرفة "اني قادرة" هي شرط اساسي للنجاح والتقدم.

-         مثال :

مشاركة من تجربتي الخاصة , قديش كان شعور "اني انا ما بقدر" مسيطر علي تقريبا من 20 سنة !

في مرحلة المدرسة, في الصف العاشر ثانوي – نهاية الحصة الاولى(من ساعتين) من درس الكيمياء, استراحة, وفجأة دخلت طالبة على الحصة, بسبب ظروف خاصة تأخرت عن الدرس. المعلمة توجهت الي وطلبت مني اساعد الطالبة واشرحلها عن المواد اللي تعلمناها في الدرس ...

كتير تفاجأت !! - "أنا؟؟" -  هاي كانت اول فكرة وردت في ذهني .

"أنا؟؟ مني انا عم تطلب المعلمة اساعد الطالبة؟؟, طيب في كتير في الصف , اشطر مني!!! ومع انه مرق اكتر من 20 سنة , بس الموقف بعده عالق في ذهني كانه الاشي صار مبارح.

-----------------------

هادا الموقف غير في داخلي كتير, وخلاني من هديك الفترة في حياتي , الجأ لداخلي اكتر , واوسع الايمان بقدراتي الداخلي اكتر . ومن هداك الوقت  وكل الوقت , عم اتحدى نفسي وبقول : "انا طبعا بقدر" واكتشفت (كمولودة برج العقرب J ) انه عندي اصرار مش طبيعي وهادا الاصرار  وصلني لأماكن منيحة في حياتي وكمان للحظات ما بحب اتذكرها.

لكن في النهاية, الايمان في القدرات والتطلع الايجابي كل الوقت , بانه "القادم أفضل " رجع ايماني في قدراتي وبالفعل انا اليوم بقدر اقول بكل ثقة "انا طبعا بقدر" ...

 عدم القدرة على تحقيق شيء معين, هو كمان صفة روحانية لحتى تحمينا من الخطر, وتقريبا كل انسان موجود على الكرة الارضية, ومن غير مبالغة, هاي القدرة مصقولة في نفسه, في الذهن (في المخ) . كأنه احنا كبشر منخلق مع جهاز فيه جملة دائمة ومتكررة :

"انا مش جيدة بما فيه الكفاية" !

لحسن حظي, كمعالجة ومبادرة ... استطعت اني اكبر واتطور واطلع من هذا المكان .

وكل ما وصلت لتحدي جديد, صغير او كبير, اصراري على النجاح والتقدم (ومنهم خلق مشروع "بكرا احلى") خلاني اعمل جهد اكبر وادور على الاجوبة .

اكثر الاحيان الجواب مربوط في تطوري والانطلاق .. والتطور هو توسيع الوعي والادراك لنفسي ومن هون بدأت اتعرف على نفسي اكتر وافهم بالزبط في ايش انا بقدر  وفي ايش انا ما بقدر ...

انا ما بقدر انط على حبل واحقق ارقام قياسية في الجمباز, يمكن اذا تدرب كفاية J . لكن مش في الوقت الحالي . ما بقدر اكون لاعبة كرة سلة محترفة في فريق NBA ولا حتى في فريق الحارة J

بس انا بقدر اعمل مشروع والمشروع يتطور لمصحلة شخصية ناجحة فيها اقدم هديتي للعالم واعطي قيم مليئة شغف ومحبة ورغبة عالية للتطور.

انا بقدر احقق احلامي ...

انا بقدر انتج منتوج في مستوى عالي ...

انا بقدر اسوق مشروعي في طريقة شفافة ومناسبة الي ...

انا بقدر اربح جيدا من الاشي اللي انا بحبه وشغوفة اله ...

انا طبعا بقدر ...

كل المطلوب مني هو "معرفة كيف", اتعلم وافهم كيف ممكن هالاشياء تنعمل وبعدها رح انجح... اكيد مطلوب مني انه اعمل كتير واصلح الامور, ومرة اخرى احاول واعمل , افهم واصلح من جديد واسأل اللي مجربين واتعلم منهم وكمان مرة اعمل واصلح ... وفي النهاية من الواضح الي تماما ... اذا بدي  - انا طبعا بقدر .

وولت ديزني قال :

"اذا بتقدر تحلم اشي , انت بتقدر تعمله "

شوفوا عزيزاتي ... عالمنا رائع , مش بالصدفة فيه ناس بتحب ترسم, وناس اخرى بتحب تغني او تمثل, واللي بحبوا الطبخ واللي بيحبوا عالم الحاسوب وحتى اللي بيعملوا بالسياسة هادا الاشي هو شغفهم ورغبتهم, وهيك احنا منقدر نستمتع من هذا العالم الحي والمتحرك كل الوقت.

هيك انا بزين بيتي في صور فنية يلي رسمها رسام , واسمع موسيقى بتعجبني من مغني يلي كتير بحب انه بس يغني, واكتب الكم عن طريق هالحاسوب يلي ما عندي ولا أي فكرة كيف بيشتغل بس بفضل الناس اللي هادا هو شغفهم انا كمان بقدر اعطيكم قيم ومعلومات تفيدكم .

انا ما بحلم اكون لاعبة كرة سلة محترفة ولا لاعبة جمباز لانه هادا الاشي هو مش شغفي ولا رغبتي. وعشان هيك من البديهي انه افترض انه هالاشي مش صحيح اني اعمله في هادا العالم او هاي الحياة, وكمان من المفترض اني ما رح اقدر ولا بكون في استطاعتي اعمل هاي الامور.

بس انا عندي الشغف اني اعمل مصلحة ومشروع, اعطي فيه الهام, امرق محاضرات واعطي قيم لغيري, وهالاشياء مش بالصدفة يلي بتحمسني . هاي الاشياء هي بالزبط الاشياء اللي الظاهر انه اجيت لحتى اعملها في هادا العالم , وهاي هي الاشياء يلي العالم طالب مني اعملها, عشان هيك بيحمسوني وواضح الي جدا انه باستطاعتي.

ما بعرف كيف ! بس طبعا انا بقدر .

عجبكم المقال ... شاركوني بأرائكم  :) 

فداء قاسم 

بكرا احلى