... طُرق عملية وعادات مكتسبة جديدة, ساعدتني في اختراق الايمان بعدم قدرتي
بعد ما شاركتكم عزيزاتي في اختراق عادة
"انا ما بقدر" بدي اشارككم هون بصورة عملية اكثر, بالعادات اليومية اللي
دخلتها حياتي ووصلتني لمكان اقدر اقول فيه بكل ثقة "أنا بقدر" ... عندي
ايمان كبير انه هذه العادات رح تساعدك انت كمان في اختراق الخوف من عدم القدرة :
1. الايمان العميق الداخلي –
في اعمق نقطة في روحي ونفسي دايما
كنت اعرف اني بقدر. عشان هيك اصريت على التقدم. "الانا الاعلى" اللي
دايما "بيدق باب" افكاري وحديثي الداخلي وبحاول يحميني لحتى احمي نفسي
من المخاطر, دايما "بينُق" ويقول : "انت ما بتقدري", وانا في
داخلي بآمن بالعكس.
وانت عزيزتي ... اذا انت هون...
انا متأكدة تماما انك قادرة . وهادا اهم اشي لانه هذا الاشي اللي رح يخليكي تكملي.
تبحثي عن الاجوبة وتجربي من جديد
اوبرا وينفري قالت :
" في اشياء كثيرة لازم اثبتها
لنفسي . واحد منهم هو انه في مقدوري اعيش حياتي من غير خوف" .
2. التعلم, التعلم ثم التعلم .... وتوسيع الوعي الفكري
-
في كتير من الاحيان انا بشعر اني
غير قادرة لما ما بعرف "كيف" اعمل الاشياء .
قبل اكم سنة اشتركت في كورس والمحاضر رسم هالرسمة يلي كانت بالنسبة الى مثل "هوريكا" او "وجدتُها" :)
هاي هي الرسمة :
المربع عبارة عن "انعكاس" او تمثيل لمساحة الادراك
والوعي الداخلي. لما انا عندي حلم بس مش
عارفة "كيف" أحققه, هادا بقول انه
الجواب لتحقيق الحلم موجود خارج المربع. هادا ما بقول انه ما في جواب ابدا , هادا بقول
انه الطريق لتحقيق الحلم او ايجاد الحلم موجود في نقطة معينة خارج الوعي والادراك
الخاص في داخلي.
عشان هيك انا بدي كل الوقت اوسع مربع الادراك لحتى اكون واعية
اكثر للطريق. وهالاشي بينعمل بمساعدة التعليم .
اليوم الانترنت مليء بشكل مش طبيعي بالمعلومات وعدا عن هيك انا استثمرت
في نفسي مبالغ مش قليلة من المال لحتى
اتعلم (وما زلت اتعلم J ) , احيانا كثيرة بلاقي حالي مُحاطة في الكتب, كل الوقت بشتري
كورسات في الانترنت, بسمع كثير راديو في الانترنت اللي اسمه PODCAST , بحضر
وبشارك في محاضرات او مؤتمرات, بلتقي مع مدربين واشخاص يلي ممكن اتعلم منهم .
كل هادا لحتى اكتسب معرفة واوسع الوعي
والادراك الداخلي عندي. والنتيجة هي:
اجوبة وافكار يلي باخدها كل الوقت وبتلقاها كل الوقت من حولي ... افكار بتراودني وبتوسع عندي موهبة الابداع في فهم
الامور حولي وبتساعدني كيف اتقرب اكثر واكثر من الحلم وشو مطلوب مني لحتى احققه .
اوليفر ووندل هولمس قال :
"الوعي والادراك لما بيكبر وبيتوسع عن طريق اكتساب خبرات جديدة ... ما
بيقدر ابدا يتراجع للخلف لحجمه القديم "
3 – وضوح :
لما تفكيرنا الداخلي (أو الحديث
الداخلي) بكون مليان لدرجة الفوضى ,
الاحساس بعدم القدرة بيراودنا بشكل سريع. عشان
هيك انا اكتسبت عادة جديدة وممتازة وهي : "كتاب استرسالية " من غير قيود
ومن غير ما احكم على حالي , صح او غلط ... كيف ؟ بمسك دفتر (سميته "دفتر "حديث فداء الداخلي J ) وعليه انا بسرد وبكتب كل اشي بيخطر في بالي .عمليا انا بعطي لكل
"الفوضى الفكرية" الداخلية تطلع للخارج .
ولما في فوضى فكرية , يعني في
"صخب" داخلي (او دوشة ), بكون كمان في كثير اصوات يلي ما بتكون صحيحة .
وصوت اللي بيقول : "انا ما
بقدر" هو ما عم يعكس بشكل حقيقي الانا الداخلي الحقيقي تبعي. الكتابة بترجع
وبتوصلني من جديد مع الانا الداخلي الحقيقي وبتعطي الامور حجمها الطبيعي من
"وجهة نظر" واقعية - REAL PERSPECTIVE .
عن طريق الكتابة انا بعطي مكان وشرعية
لكل الاصوات في داخل الرأس (الحديث الداخلي) , ؤبسأل نفسي كتير أسالة ومن خلال
الكتابة نفسها الاجوبة بتطلع .
في البداية كنت ادور على الاجابات خارج
اطار "تفكيري الداخلي", من اصدقاء ومن كتب وقراءة والعديد من الاماكن...
اليوم انا وصلت لوعي انه الاجابات موجودة في داخلنا وفي نفسنا , عشان هيك انا بعطي
الفرصة الكافية للإصغاء لمشاعري اكثر وللمكان يلي بخليني اشعر صادقة مع نفسي .
4
- العمل
انا بآمن جدا في العمل . انه اقوم
واستغل كل النشاط بالخروج والعمل . ومن خلال العمل الانسان شوي شوي, بيوصل للمكان الدقيق بالنسبة اله (الاكثر صحيح
) , لانك توصلي للمكان ال PERFECT –
المتكامل والمهني لدرجة رفيعة, رح
يأخرنا في العمل, عشان هيك ما لازم نستنا "الكمال" او نستنى لحتى الامور
تكون واضحة ومفهومة, وانما نخرج للعالم مع رسالتنا , مع "الانا مؤمن"
الخاص تبعنا ومع ايش احنا بدنا نعمل ونبني.
احنا منقدر ناخد كتير اجوبة من التفكير
والتخطيط, لكن الكثير من الاجابات بتوصلنا من "ساحة العمل" نفسها ومن
احتكاكنا المباشر مع الناس, عشان هيك انا كل الوقت بحاول انه اضل متحركة وفي عمل
دائم .
من اللي بتابعوني بتقدروا تنتبهوا انه
مثلا ... مشروعي هادا لنساء مبادرات ونساء عندهم رؤيا لتحقيق ذاتهم , المشروع
دائما في حركة تطور, لاني انا كل الوقت بعمل وبعكس العمل على المشروع.
كل مرة من جديد بفهم شو صح الي وبدقق
اكثر وبضيف كثير اشياء يلي ما كنت رح اضيفها اذا ما كنت في "حركة عمل"
كل الوقت.
5
– الصداقات !! يا الهي قديش مهمة هاي النقطة !!
دائرة الصداقات تغيرت عندي مع الوقت
ودايما للأحسن , واليوم انا وصلت لمرحلة اني محاطة بصديقات مبادرات وأيضا صديقات
يلي وصلوني من عالم الاعمال , بيعرفوني
وبيعرفوا عالمي وبيعرفوا يكونوا معي كمان لما "ما بآمن في نفسي "
!
حياتنا كمبادرات هو بالزبط مثل
"القطار الجبلي" , مرة منكون في مكان عالي وفجأة ممكن نوصل لمكان جدا
واطي .
بالزبط هيك مثل هالصورة اللي لاقيتها مرة في الانترنت , وكتير حبيتها :)
عشان هيك من المهم جدا انك تحيطي نفسك
في نساء قريبات من تفكيرك ومن وجهات نظرك وكمان نساء ايجابيات , مشجعات يلي دايما
بيذكروك قديش انت "قادرة" ورائعة بكل لحظة لما يكون عندك شك بالامر .
نساء يلي ممكن يعطوكي نصيحة بكامل الذكاء وكتف حنون للبكاء عليه اذا احتاج الامر
من دون "عتاب" سلبي طبعا.
"لاقيتي
مجموعة نساء او اشخاص ممكن يشجعوكي ويدعموا الابداع عندك ويكونوا اشخاص
"ملهمين" بالنسبة الك ... رافقيهم وقضي اكثر واطول وقت معهم لأنه هادا
هو اللي رح يغير حياتك"
6
- "اكيد
انا بقدر"
هاي الجملة انا كتير برددها مع نفسي في
كل مرة بدي اعمل اشي ومش عم ينجح معي او اني انا مش عارفة بالزبط
"كيف"...
عشان هيك دايما بقول لنفسي :
"طبعا واكيد انا بقدر بس انا لازم اعرف كيف ... " وهادا بحد ذاته بخفض
درجة "الضغط" الداخلي وبيمكني من العمل والاستمرار بالعمل. انه اعمل اشي
, حتى لو انه مش "متكامل " 100% , هيك انا بخرج وببدا في العمل.
تلخيص , وفكرة الك مني :)
كتير مهم اقلك اني الاشي اللي كمان
مانعني هو الشعور باني "ما بقدر" واعترفت مع نفسي بهادا الاشي , وعملت
خطوة جدا مهمة للتغيير . وفقط "الفهم والادراك" بحد ذاته خلى كل هاي
الاحاسيس تذوب وتختفي !
هادا ما بقول اني ولا مرة بشعر او رح
أشعر في المستقبل "بالعجز" او "عدم القدرة". ابدا, هالشعور
اكيد "بيدُق باب" روحي ونفسي من جديد, لاني "بشر" وهادا
طبيعي. القصة انه انا واعية ومُدركة لهالشعور بشكل اكبر , وبعرف بالزبط شو من
الصحيح الي انه اعمل في هديك اللحظة.
انا بعرف انك
قادرة تعملي الاشي اللي حاسة انه بثيرك وبهمك وانه كتير صح انه تعمليه وكمان لانه
جاي على بالك تعمليه ... آمنة في نفسك وانطلقي للعمل لحتى تلاقي الطريق كيف تعملي
هالاشي .
عجبكم المقال ... قدموه هدية لأعزاكم :)
فداء قاسم
" بكرا احلى "