المُماطلة - التأجيل Procrastination
كل واحدة فينا عندها مشاريع, مهمات يلي
بتعملها وبتخلصها بشكل فوري , ولكن ! في مهمات ومشاريع اللي نماطل جدا في تنفيذها ...
منأجل لثاني يوم, للشهر الجاي, لما يجي
على بالي, لما اكون متفرغة اكثر,
واغلب الأحيان منأجل ومنماطل لوقت غير
محدد ابدا !
والمقابل , رغباتنا انه هاي المهامات
او المشاريع تتحقق موجودة ...
السؤال اللي بيطرح نفسة :
ليش صعب نعمل هاي المهمات ؟
ليش احنا منماطل ؟
شو في من ورا المُماطلة ؟ شو سببها ؟
انا منضمة لنادي الناجعات في الانترنت, اللي بيقدم محاضرات اونلاين في موضوع النجاعة, والمحاضرة الاخيرة كانت يوم الجمعة الماضي , عن "التأجيل" .
انتظرت هالمحاضرة بفارغ الصبر ... وما صدقت وينتا اسمعها لانه انا نفسي ومرات كتيرة الممطالة والتأجيل بتاخد حيز مش قليل من توتري وبتأثر كتير على طاقاتي.
كانت محاضرة جدا شيقة لاني اخدت منها
مادة جدا قيمة وعندي رغبة اني اشاركك فيها , لانه رغبتي في اطلاق المعلومات اللي
عندي لنساء اخريات , صارت "منهج حياة" وهادا جدا بيسعدني :)
من المحاضرة تعلمت انه في 4 انواع من
التأجيل :
1.
مماطلة سببها , قلة او احتياج كبير لطاقة .
2.
مماطلة سببها قلة المعرفة .
3.
مماطلة مع خلفية عاطفية .
4.
مماطلة "حسية" او مماطلة يعود سببها لشعور
مخفي صعب تفسيرة.
خلال المحاضرة كان في تمرين هدفة
التعامل مع مشروع واحد – كبير ومؤجل من فترة طويلة, وبعد ما عرفت شو السبب من ورا
المماطلة (واحد من الاسباب اللي ذكرتها سابقا) , وكمان تعرفت على "طرق التعامل"
وتفكيك المشروع المؤجل, بلش فهمي ايضا للمماطلة يوخد حيز اخر .
*** هادا تحدي مش بسيط بالنسبة الي اني
الخص محاضرة 3 ساعات في بوست قصير :) لكن
رح اشارككم في الادوات والحكم اللي اخدتها الي من الموضوع اللي قسم منها انا عم
استعملها بالوقت الحاضر في حياتي وعم تساعدني كتير لدفع المشاريع وتحقيقها . ***
1.
فكروا "ببساطة" والامور بتتطور بشكل اسهل :
احنا كبشر
عندنا عادة غريزية في تعقيد الامور وتركيبها وبالأخص اذا المشروع كبير بطبيعته,
منصير نشوفه اكبر واكبر, ومنعقده اكثر
واكثر , والنتيجة : ما بعود عنا طاقة , شغف, ورغبة لحتى نحققة .
اخدت
منترا MANTRA بسيطة جدا (المانترا هي : مقولة – او جملة يتم ترديدها لحتى تأثر
على التفكير الباطني والحديث الداخلي في اللاواعي عنا )
بتقول
المانترا : "فكري ببساطة" ودخلتها لحديثي الداخلي
اكثر من مرة, وهادا الاشي ساعدني اطلع الامور على الضوء واشوفها قدامي مكتوبة كمان
...
وصحيح
جدا انه الاشي بعيد انه يكون "كامل"
PERFECT ولا حتى ايضا "متكامل", لانه مش
مهم الكمالية قد ما مهم انه هالمشروع ينطلق, يبدا من شي نقطة ويطلع على الضوء,
يصير حقيقة واقعية .
"البساطة"
بتعمل نتائج ملموسة, "البساطة" بتعمل حركة , بتعمل حياة !
2. DATE معاي :) موعد مع حالي :)
بدل ما ابدأ "أجلد نفسي" وادخل في احباط مع نفسي
انه الامور ما عم تمشي, ما عم تتقدم, وكل اشي بماطل فيه وعم يتأجل ...
"وقفي" !!
رتبي موعد مع نفسك, وفي هذا
اللقاء, امسكي ورقة وقلم اكتبي ووضحي لنفسك شو سبب المماطلة ؟ شو اللي عم يمنعك ؟
شو المعلومة او المعرفة اللي ناقصتك لحتى تتقدمي بالمشروع ؟
وممكن كمان يكون لقاءك مع صديقة قريبة جدا منك لحتى تساعدك بوجهة نظرها بالموضوع وتكون مرآة الك للمستقبل وتذكرك تحققي الاشي وما تنسيه .
3. EAT THE ELEFANT - التحليل لمركبات - تحليل لخطوات صغيرة :
ممكن الاشي لاول مرة يكون
"سخيف"نوعا ما ! لكن اغلب الناس ما بتعمل هادا الاشي اللي هو عمليا :
"مفتاح التغلب على المُماطلة" .
باللحظة اللي بتشوفي قدام عينيكي
مشروعك, مقطع او مركب من خطوات صغيرة جدا – خطوات ممكن قياسها بوقت قصير, مشروعك
بهالوقت بكون واضح اكثر ومخيف اقل ...
وبدل ما تكتبي جملة كبيرة مثل : "بدي
اخد قرض من البنك" – بحللها لمركبات اصغر :
1. اخد معلومات من الانترنت عن الضرائب للقروض.
2. اتصال هاتفي مع البنك الاول واخد معلومات عن القرض.
3. اتصال هاتفي مع البنك الثاني واخد معلومات عن القرض
من البنك الثاني.
4. اخد قرار من أي بنك اخد القرض.
5.
اعبي كل
الاوراق المطلوبة وامضي عليها.
6.
ارسال الاوراق للبنك .
أو :
"بدي
انزل موضوع للبلوغ"
1.
كتابة النص على ملف وورد.
2.
الاقي صورة مناسبة للموضوع.
3.
اشتغل على تصميم الصورة وقياساتها.
4.
انزل النص على البلوغ مع الصورة .
5.
ابعت لينك للمجموعة والصفحة لنشر الموضوع.
4.
عَمَل , فِعل Aktion
بعد ما حللنا
المشروع لمركبات صغيرة , نضع الخطوة الاولى في اليوميات لتنفيذها واعملي هادا الاشي مع شغف عالي
وانبساط, لانه هالخطوة الأولى هي الدفعة او الدفشة لباقي الخطوات .
5. Deadline
الاحتمال انه
الخطوات اللي كتبتيها تتحقق , بيزيد وبيرتفع لما تعملي Deadline خارجي , شو يعني ؟
مثال: موعد
لتقديم وظيفة جامعية – موعد زواج – موعد مع زبون – موعد نقل لبيت جديد الخ ... لما
في تاريخ محدد ومعين , التنفيذ بكون واقعي اكثر .
لكن لما
المشروع اللي عم تماطلي في هو مشروع – شخصي – الي – وما في DEADLINE خارجي (مثل : اعمل البوم صور لابني – اصمم صالون البيت
من جديد) من المفضل اعمل DEADLINE خارجي مع نفسي والتزم فيه مع نفسي لحتى انفذه . ومن المفضل مشاركته مع طرف
خارجي, شو يعني ؟
التزم قدام صديقة او اعلن عن هاي المهمة في الفيسبوك في بوست قدام اصدقائي مع التزام بتاريخ لحتى يذكروني ويضلوا وراي بالقصة .
ومرات !
مش كل اشي منأجلة ومنماطل فيه بحياتنا سببه
"التأجيل" ذاته :
في اشياء بحياتنا لازم نمرقها
ونجربها , في طريق لازم نعيشه واحيانا كثير لازملنا التجارب المعينة ولازملنا
الوقت لحتى نكون حاضرين للعمل ولنكون حاضرين نطلق المشروع اللي اجلناه .
وبالآخر
كل اشي بصير بوقته
بصير بالوقت المناسب الك وبصير بس لصالحك :)
بحب اسمع منك شو تعلمتي, شو استفدتي وايش رح تطبقي من المعلومات ؟
واسبوع رائع بتمنالك
فداء غنيمة